Kung Para sa Pangarap at Ngiti Nila'y Pag-iipunan Ko

Talo na sana ako,
kung sinukuan ko
ang PANANALANGIN.
Buti may Panginoong,
KUMAKAMPI
sa may mabuting hangarin.

Kung natakot ka sana sa karma,
hindi ka maiiwang mag-isa.
Kung dati palang dininig mo na
ang kaniyang pagmamakaawa.
Tangan mo pa rin sana
ang dalangin nya.

Salamat July
sa mga natutunan ko.
Magkikita tayong muli,
pero wag ka nang magsama
ng bagyo.

Kapag walang bilang
ang pinaghirapan.
Tumingin nalang
sa iyong natutunan.
Sa mundong minsa’y
normal lang maglamangan.
Sana’y patuloy ka pa rin
sa patas na laban.

Nagiging espesyal ang Linggo,
kapag sinama mo ang pamilya at
ang Panginoon sa pahinga mo.

Alam nating malupit
magturo ang TADHANA.
Ngunit tuloy pa rin tayo
sa PAGBALEWALA.
BULAG sa
sugat ng kalikasang lumalala.
MANHID sa pag-akalang
WALA NANG MAGAGAWA.

Magsawalang-kibo,
dahil sanay na ring mabigo.
Magpapakumbaba,
dahil yun lang ang magagawa.
Magbakasakali,
aasang maging ayos muli.
Makakalimutan,
na may panahong
ika’y minamahal at iginagalang.

Mas bumigat ang pagtapak
sa daang pinangarap nating dalawa.
May lungkot na nga’t pag-iyak
ngunit tuloy pa rin sa nasimulan na.
Dalangin nalang sa sulok
na kahit sa panaginip, makita ka.

Masambit ko man lang…

Tila malungkot din ang ulan
kapag napadpad siya
sa hindi siya mapapakinabangan.
Parang puso kapag iniwan,
takot ng magtiwala’t
ayaw ng maligo pag nasa bahay lang.

Nakakatamad
kapag tahimik,
kapag mainit,
kapag wala ka sa tabi
na nagpupumilit.
Pangitiin ang tulad kong
palaging magulo ang pag-iisip.
Nakakatamad.

Bihira lang akong magsimba.
Pero pag ako nagdasal, lahat damay
sa hiling na kapayapaan at grasya.
Miss Universe mindset ba.

Panay may pamilya na
ang aking mga kaibigan.
Kumbaga sa kwento ng pagong at kuneho,
ako ang pagong na laging naiiwan.
At sila?
Sila yung unggoy
na nagkukuwento ng problema
kapag may inuman.

Panginoon, salamat po
sa hindi Mo pagtatampo
pag nakakalimot ako.

Ramdam ang masamang motibo
ng taong hayok marespeto.
Kunyaring mabait ang palalong,
aninag ang sungay sa anino.

Kapag wala ng kulay MALUNGKOT.
Parang hindi na rin mabango ang talulot.
Ihahandog sa bago’t susunod.
Ala-ala ng likas na yamang napudpod.